O interese polo cine dun grupo de rapaces con discapacidade intelectual levou á educadora social Elena Álvarez a desenvolver un proxecto de aprendizaxe transversal que empregase a creación audiovisual como un método para fomentar o desenvolvemento da autonomía en persoas con necesidades de apoio.
Sanatorio é a segunda curtametraxe que se realiza na Asociación Aspronaga da Coruña como parte desta labor de integración social. Jacobo Paz, dramaturgo e guionista de series de televisión como Pratos combinados ou As leis de Celavella, reuniuse cos diminuídos psíquicos para que lle explicasen que tipo de historias lles gustaban e que clase de personaxes lles gustaría interpretar. As preferencias destes rapaces estaban orientadas cara o cine de terror e as películas de suspense.  
Para facer viábel o proxecto foi necesario idear historias que acontecesen nas instalacións de Aspronaga. Froito deste traballo xurdiron dúas curtametraxes. A primeira foi Masacre, subvencionada pola Consellaría de Cultura e Deporte da Xunta de Galicia e dirixida por Juan de Oliveira. A segunda é Sanatorio, fotografada e editada por Jesús Cao. A curta conta cunha banda sonora na que colaboraron de forma desinteresada os galegos Fanny + Alexander e o grupo de rock Instiga, de São Paulo.  Sanatorio quere provocar a reflexión dos que constrúen o futuro esquecendo o pasado. 

Cando alguén enferma até esquecer quen é, ¿como pode recuperar a súa identidade?

A Coruña

A curtametraxe foi gravada nun único día, o 24 de xullo do 2006, e estreouse no Cine Teatro de Ribadeo o 23 de febreiro do 2007.

Música: Noel Feáns (Fanny + Alexander), Efigenia Arias (Fanny + Alexander), Heitor Pellegrina (Instiga),Pedro Leite (Instiga), Christian Camilo (Instiga), Gabriel Duarte (Instiga)